Ons hou huissport, met die sing van tradisionele sportliedjies, kleuroptogte en heerlike sportmansgees.  Kindwees bly vir ons ‘n prioriteit en ons moedig leerders aan om kaalvoet skool toe te kom, te speel en hulle uit te leef in hulle leeromgewing.

Ons skool is klein genoeg om individuele aandag aan elke leerder te gee om effektief te kan meeding teen enige ander skool in ons omgewing.  Kwaliteit onderrig en opvoeding word weerspieël in ons prestasies van ons leerders hier, sowel as in die hoërskool.

Ons skool beskik oor ‘n uitsonderlike rekenaarsentrum met topkwaliteit programme wat leerders in Wiskunde en tale verryk. 

Om daarby aan te sluit bied ons Abacus, ‘n Wiskunde program, nie net as ‘n buitemuurse aktiwiteit aan nie, maar ook as deel van ons daaglikse program in klastyd.  Alle Gr R en 1 leerders kry dus die geleentheid om Abacus te gebruik.  Wiskunde vorm die basis van ‘n kind se onderrig en hierdie hulpmiddel is ondersteunend en verrykend.

Dis so belangrik dat ons as Afrikaans-sprekende skole ons taal moet beskerm deur ons kultuur en tradisies in te span om ons kinders te verryk.  In ‘n klein dorpie soos Heidelberg met so ‘n ryk kultuurerfenis moet ons as Afrikaans-sprekendes elke kind die geleentheid bied om ons taal en geskiedenis te leer ken.

Indien jou kind se opvoeding en kultuur vir jou as ouer belangrik is, moedig ons jou aan om ons te kontak om te verseker dat jou kind in genoeg ruimte, net gelukkig kan wees.  Gee jou kind die geleentheid om ‘n kaalvoetkind te wees, te kan speel, en om ook met uitstekende onderrig bo ander te kan uitstyg.

Vriendelike groete

Me Selma Marx

Skoolhoof